Storia del mio paese...... In friulano.......

Glemone

La ete protostoriche e romane

Glemone e fo za in ete preistoriche, un dai passaçs plui impuartants su la strade che e menave ai pas des Alps nord orientâls. Su la piche dal Cumieli, la mont chi dongje, si cjate ancjemò in dì di vuê cualchi toc di muris che si riferìs a un cjastelîr di gjenar carsic che si pense instalât alì tra il 1300 e il 1100 prin di Crist. Inte borgade di Gôt a son stadis cjatadis olmis di insediaments celtics dal 500 prin di Crist. In chê stesse zone al è atestât il toponim Silans: il tiermin, che si riferìs a une fontane che e esist ancjemò cumò, al podarès fâ pensâ ae localitât Ad Silanos, sît che la Tabula Peutingeriana, une sorte di stradari dai antîcs itineraris romans piturât inte Ete di Mieç, e segne tant che lûc di polse su la strade tra Aquilee e il Noric (la Austrie di cumò). La idee de esistence di un antîc insediament roman su la strade Julia Augusta e je sapontade sedi de presince de fontane (silanus par latin al vûl dî risultive, mascaron di fontane), che di une cuantitât di reperts archeologjics di ete romane (ancje olmis de strade stesse). Un pôc plui de bande dal nord, inte borgade di Ospedâl, simpri in comun di Glemone, a son stadis cjatadis ancjemò olmis de strade intune cun iscrizions, urnis cinerariis e monedis, che a fasin pensâ a un secont insediament propit dulà che la strade e tacave a strenzisi jenfri lis monts.

Dal 166 al 452 daspò di Crist si verin lis invasions dai Cuâts, dai Marcomans, dai Visigots e dai Uns. Dal 489 al 553 il Friûl al patì la ocupazion dai Ostrogots di Teodorì, che un grup si fermà inte localitât che cumò e à non Gôt. Tra il 553 e il 568 i Bizantis a ocuparin la citât che fin al 776 e fo dominade dai Langobarts.
Glemone e je nomenade pe prime volte dal storic di Cividât Pauli Diacun inte Historia Langobardorum, dulà che si cjate un Castrum Glemonae, vadì une fortificazion langobarde fate sù par volontât dal duche Gisulf intal 611 daspò de invasion dai Avars.
Sot de dominazion dai Carolins (776-952) il prin centri urban di Glemone al tacà a svilupâsi.


Il stât patriarcjâl di Aquilee

Daspò des invasions dai Ugars la citât e tornà a dâ sù. Cu la dominazion dai Otons in Friûl e in graciis de azion di ricostruzion dai Patriarcjis di Acuilee, Glemone e deventà un dai plui grancj centris dal Patriarcjât. Intal secul XI Glemone si mudà di arimanie langobarde in feut ministeriâl e e deventà, a metât dal secul XII, libare Comunitât cui siei statûts.

Il Patriarcje al tignì par se il dirit di nomenâ il Cjapitani e di meti lis impuestis su lis ativitâts dal cumierç. Intal 1149 l´imperadôr Corât III che al tornave indaûr de II Crosade, si fermà a Glemone cul Patriarcje Pelegrin V. Intal 1184 il Patriarcje Gofrêt al ve dal imperadôr Fidrì II Hohenstaufen il permès di fâ sù il marcjât a Glemone: no podevin sei altris cumierçs publics ni plui in sù, tra Mont di Crôs e Pontebe, ni plui in jù di Glemone par une mie. Chest at al prove che la citadute e jere cetant svilupade, e podeve garantî contratazions regolârs, cun bancuts e buteghis e une schirie di ativitâts esercitadis di artesans, cjaradôrs, marescalcs, albergadôrs.
Intal 1210 al fo fat sù l´Ospedâl di Sante Marie, che po al deventà dal Spiritussant.

Viers la metât dal secul XIII il Patriarcje al concedè a Glemone il dirit dal “Niederlech”, che al ven dal todesc Niederlegung (discjariament), dazi di dipuesit obligatori. Daûr di chest dirit lis marcjanziis che a vignivin de Carinzie vie par Vignesie o che a tornavin indaûr, a vevin di fermâsi un dì e une gnot, vignî scjariadis, boladis e di gnûf tornadis a cjariâ su cjars gnûfs. Vie pal Dusinte Glemone e tacà a slargjâsi di fûr de prime cente di muris.
Intal 1313 il cont Indrì di Gurize al rivà a cjapâ la citadine. Sot dal Patriarcje Bertrant, batudis lis trupis gurizanis, Glemone e deventà la capitâl di un dai cinc distrets aministratîfs di difese dal Friûl. Il taramot dal 1348 al sdrumà plui di miezis cjasis intune cul cjampanili dal domo. Intal 1370 Glemone e tacà a sierâsi cuntune tierce cente di difese che e vignarà finide intal 1399. Vie pal Tresinte Glemone e cognossè il massim de glorie, si inricjì di glesiis gnovis e palaçs, tant che intal 1337 e rivà a consacrâ l´ampliament dal domo e la gnove glesie di Sant Zuan.

La dominazion di Vignesie

Intal 1420 Glemone e passà sot de Republiche Venete ancje se e tignì bogns ducj i siei antîcs dirits e privileçs. Di chest moment indevant, dut câs, la citât e tacà biel planc a lâ in mancul par colpe di une schirie di pestilencis e diluvions e parcè che i trafics comerciâi a forin disviâts par altris stradis. Cun di plui e lave indevant la vuere tra la Republiche Venete e i Arciduchis di Austrie.

Dai timps di Napoleon fin in dì di vuê

Intal 1797, cuant che a rivarin i francês cun Napoleon, Glemone e jentrà inte Republiche Cisalpine e, cul tratât di Cjampfuarmit (17 di Otubar dal 1797) e passà sot dal Imperi austro-ungaric. Intal 1805, i francês le cjaparin dentri intal Ream italic, e deventà duncje capitâl dal cuart distret aministratîf de Provincie dal Friûl che al cjapave dentri Tarcint e il Cjanâl dal Fier. Intal 1813 a tornarin i Austriacs e intal 1815 Glemone e deventà part dal Ream lombart-venit ancje se par une curte dade di timp, vie pes solevazions dal 1848, e gjoldè di une vite politiche autonome. Intal 1866, cuntun plebissît, e jentrà intal Ream talian. Intal secul XX par ben dôs voltis i todescs a invaderin la citadute: intal 1917-18 e intal 1943-45. Intal 1944-45 a rivarin chenti ancje i Cosacs. Intal març dal 1945 la zone de stazion feroviar

ie e fo devastade di un grues bombardament di avions anglo-americans.

I catastrofics taramots dal 6 di mai e dal 15 di setembar dal 1976 le sdrumarin cuasi dal dut.

In dì di vuê Glemone si presente al visitadôr tornade a fâ sù dal dut intes ativitâts

sociâls, economichis e inte valorizazion dal patrimoni culturâl.